सोलापुरात राज ठाकरे - शरद पवार एकाच हॉटेलमध्ये मुक्कामी

लोकसभा निवडणूक २०१९
Updated Apr 16, 2019 | 12:42 IST | टाइम्स नाऊ मराठी

राज ठाकरे सध्या काँग्रेस-राष्ट्रवादी काँग्रेसच्या लोकसभा उमेदवारांसाठी प्रचार सभा घेत आहेत. यानिमित्तानं सोमवारी सोलापुरात झालेल्या सभेनंतर राज ठाकरे जिथं थांबले, त्याच हॉटेलमध्ये पवारही थांबल्याची माहिती आहे.

Raj Thackeray and Sharad Pawar
राज ठाकरे-शरद पवार एकत्र   |  फोटो सौजन्य: Representative Image

सोलापूर: मनसे अध्यक्ष राज ठाकरेंनी गेल्या महिन्यात राष्ट्रवादी काँग्रेस पक्षाचे अध्यक्ष शरद पवार यांची त्यांच्या निवासस्थानी जाऊन भेट घेतली होती. २२ मार्चला झालेल्या या भेटीनंतर काँग्रेस-राष्ट्रवादी काँग्रेसच्या उमेदवारांसाठी प्रचार करण्याचं राज ठाकरेंनी आपल्या सभेत जाहीर केलं. मोदी-शहा या जोडीला पराभूत करण्यासाठी प्रचार करणार, असं राज ठाकरे म्हणाले. त्याच पार्श्वभूमीवर राज ठाकरे सोमवारी सोलापुरात काँग्रेसचे उमेदवार सुशीलकुमार शिंदे यांच्या प्रचारासाठी आले होते. सभा संपल्यानंतर राज ठाकरेंनी ज्या हॉटेलमध्ये मुक्काम केला त्याच हॉटेलमध्ये शरद पवार हे सुद्धा थांबले होते. मात्र त्यांची भेट झाली की नाही, हे अजून स्पष्ट झालेलं नाही.

उस्मानाबादची आपली सभा संपवून राष्ट्रवादी काँग्रेसचे अध्यक्ष शरद पवार मंगळवेढ्याला माढाचे उमेदवार संजय शिंदे यांच्या प्रचारासाठी जाणार होते. रात्री मुक्कामासाठी ते सोलापूरच्या हॉटेल बालाजी सरोवर इथं थांबले होते. तिथं त्यांना मनसेचे कार्यकर्ते भेटले. त्यांनी राज ठाकरे सुद्धा याच हॉटेलमध्ये थांबले असल्याचं पवारांना सांगितलं. पवारांनी राज ठाकरेंची सोलापुरातील सभा कशी झाली याबाबत मनसे कार्यकर्त्यांना विचारपूस केल्याची माहिती मिळते आहे. पण दोन्ही नेते एकाच हॉटेलमध्ये असूनही भेट न होणं याबाबत आश्चर्य व्यक्त केलं जात आहे. याबाबतचं वृत्त एबीपी माझा या वृत्तवाहिनीनं दिलं आहे. 

काय म्हणाले राज सोलापुरच्या सभेत?

दरम्यान, सोलापुरच्या सभेत राज ठाकरेंनी पुन्हा एकदा पंतप्रधान नरेंद्र मोदी आणि भाजप अध्यक्ष अमित शहा यांच्यावर जोरदार हल्ला चढवला. भाजप सरकारकडे ढुंकूनही पाहू नका, असं आवाहन त्यांनी मतदारांना केलं. तसंच राज ठाकरेंनी सरकारच्या डिजिटल इंडिया कॅम्पेनची पोलखोल केली. सरकारच्या जाहिरातीत काम केलेल्या तरुणालाच राज ठाकरेंनी सभेत मंचावर आणलं. मनोहर खडके या तरुणानं अमरावती जिल्ह्यातील हरिसाल हे गाव डिजिटल व्हिलेज असल्याच्या सरकारी जाहिरातीत काम केलं होतं. मात्र ही जाहिरात खोटी असल्याचा दावा राज ठाकरेंनी केला आणि गाव सोडून कामाच्या शोधात शहरात आलेल्या मनोहरला सर्वांसमोर उपस्थित केलं.

उस्मानाबादमध्ये काय म्हणाले शरद पवार पाहा...

सोलापुरात रात्री मुक्कामापूर्वी शरद पवारांनी उस्मानाबदेत सभा घेतली होती. या सभेत त्यांनी पंतप्रधान नरेंद्र मोदींच्या पवार कुटुंबावर केलेल्या टीकेला प्रत्युत्तर दिलं. ‘माझ्या पुतण्यानं घराचा सर्व कारभार जरी आपल्या हाती घेतला तरी मला काळजी नाही’, असं म्हणत शरद पवारांनी मोदींना टोला लगावला.

ताज्या बातम्यांच्या अपडेटसाठी Times Now मराठीच्या फेसबुक पेजला लाइक करा.

लोकप्रिय वीडियो
पुढची बातमी
सोलापुरात राज ठाकरे - शरद पवार एकाच हॉटेलमध्ये मुक्कामी Description: राज ठाकरे सध्या काँग्रेस-राष्ट्रवादी काँग्रेसच्या लोकसभा उमेदवारांसाठी प्रचार सभा घेत आहेत. यानिमित्तानं सोमवारी सोलापुरात झालेल्या सभेनंतर राज ठाकरे जिथं थांबले, त्याच हॉटेलमध्ये पवारही थांबल्याची माहिती आहे.
Loading...
Loading...
Loading...