New Year First Day Earthquake : नव्या वर्षाच्या पहिल्या दिवशी भारतात भूकंप

3.8 Magnitude Earthquake In Haryana, Tremors Felt In Delhi : नव्या वर्षाची सुरुवात आज (रविवार 1 जानेवारी 2023) झाली. वर्षाच्या पहिल्याच दिवशी भारतात भूकंपाची नोंद झाली. भूकंपाचा केंद्रबिंदू हरयाणातील झज्जर येथे जमिनीखाली 5 किमी. अंतरावर होता.

3.8 Magnitude Earthquake In Haryana, Tremors Felt In Delhi
नव्या वर्षाच्या पहिल्या दिवशी भारतात भूकंप  |  फोटो सौजन्य: Representative Image
थोडं पण कामाचं
  • नव्या वर्षाच्या पहिल्या दिवशी भारतात भूकंप
  • भूकंपाचा केंद्रबिंदू हरयाणातील झज्जरमध्ये
  • भूकंपामुळे जीवितहानी झालेली नाही

3.8 Magnitude Earthquake In Haryana, Tremors Felt In Delhi : नव्या वर्षाची सुरुवात आज (रविवार 1 जानेवारी 2023) झाली. वर्षाच्या पहिल्याच दिवशी भारतात भूकंपाची नोंद झाली. भूकंपाचा केंद्रबिंदू हरयाणातील झज्जर येथे जमिनीखाली 5 किमी. अंतरावर होता. 

'नॅशनल सेंटर फॉर सिस्‍मोलॉजी'च्या (NCS) अहवालानुसार हरयाणात आज (रविवार 1 जानेवारी 2023) मध्यरात्री 1 वाजून 19 मिनिटांनी 3.8 रिश्टर क्षमतेच्या भूकंपाची नोंद झाली. या भूकंपामुळे जीवितहानी झालेली नाही. नव्या वर्षाच्या स्वागतासाठी ठिकठिकाणी पार्ट्यांचे आयोजन करण्यात आले होते. या वातावरणात अनेकांना भूकंप जाणवला नाही. 

मागील काही वर्षांपासून अधूनमधून दिल्ली एनसीआरमध्ये तसेच आसपासच्या ठिकाणी सौम्य स्वरुपाचे भूकंप होत आहेत. दिल्लीला हिमालय रिजनमुळे भूकंपाचा धोका निर्माण झाला आहे.

हिमाचल प्रदेशमधील मंडी येथे शनिवार 31 डिसेंबर 2022 रोजी पहाटे 5 वाजून 51 मिनिटांनी 2.8 रिश्टर क्षमतेच्या भूकंपाची नोंद झाली. हा मागील वर्षात नोंद झालेला भारतातील शेवटचा भूकंप होता. याआधी 21 डिसेंबर 2022 रोजी लाहौल-स्पीति जिल्ह्यात 2.6 रिश्टरच्या तर 16 डिसेंबर 2022 रोजी किन्नौर जिल्ह्यात 3.4 रिश्टरच्या भूकंपाची नोंद झाली. 

Pausha Putrada Ekadashi 2023 : कधी आहे 2023 मधील पहिली एकादशी?

Pausha Putrada Ekadashi Vrat Kataha: पुत्रदा एकादशी 2023; जाणून घ्या व्रत कथा, शुभ मुहूर्त, पूजा विधी

सततच्या सौम्य धक्क्यांमुळे भारतात चिंतेचे वातावरण

भूगर्भात मोठ्या प्रमाणावर हालचाल झाल्यामुळे भूकंपाचे धक्के जाणवले. मात्र अद्याप जगातील कोणत्याही संस्थेला खात्रीने विशिष्ट भागात विशिष्ट दिवशी विशिष्ट क्षमतेचा भूकंप येईल असा ठाम अंदाज व्यक्त करणे शक्य झालेले नाही. पावसाप्रमाणे भूकंपाविषयी विश्वासार्ह अंदाज व्यक्त करणे कठीण आहे. पण सतत जाणवणाऱ्या सौम्य धक्क्यांमुळे भारतात चिंतेचे वातावरण आहे.

भूकंप येत असल्यास घरात स्वतःचे रक्षण करण्याचे उपाय

  1. विजेची उपकरणे, गॅस जोडणी बंद करा; काचेच्या वस्तूंपासून आणि काचेच्या खिडक्यांपासून दूर राहा
  2. जमिनीवर शक्यतो मोकळ्या जागी अथवा खाटेखाली अथवा जड टेबलाखाली असलेल्या मोकळ्या जागेत शांत बसा. हाताने डोके आणि मान झाका
  3. गादीवर झोपले असल्यास तसेच राहा, उशीने डोके आणि मान झाका
  4. भूकंप जाणवत असताना शांत राहा, सुरक्षित राहा पण उगाच धावपळ करू नका
  5. लिफ्ट वापरणे टाळा, जिन्याचा वापर करा

भूकंप येत असल्यास घराबाहेर स्वतःचे रक्षण करण्याचे उपाय

  1. भूकंप जाणवू लागल्यास मोकळ्या मैदानात जा, वाहनात असल्यास वाहन आहे तिथेच थांबवा आणि शांत राहा
  2. शक्यतो उंच इमारत, पूल, विजेचे अथवा दिव्याचे खांब, विजेच्या तारा आणि विजेची उपकरणे, मोठे झाड यापासून दूर राहा

भूकंपाममुळे ढिगाऱ्याखाली दबल्यास स्वतःचे रक्षण करण्याचे उपाय

  1. शांत राहा, रुमाल अथवा कापडाने चेहरा झाकून घ्या
  2. एखादी अवजड वस्तू हाती लागल्यास थोड्या थोड्या वेळाने जमिनीवर ती वस्तू आपटून हलका आवाज करा किंवा शिटी वाजवा यामुळे मदत करणारे पथक लवकर आपल्यापर्यंत पोहोचू शकेल
  3. धूळ उडवू नका, आगपेटीचा (काडेपेटी) वापर करणे टाळा 

ताज्या बातम्यांच्या अपडेटसाठी Times Now मराठीच्या फेसबुक पेजला लाइक करा.

पुढची बातमी