सोनिया गांधींनी पंतप्रधान मोदींना लिहिले पत्र, कोरोनाबाबत दिल्या ५ सूचना 

पंतप्रधान नरेंद्र मोदी यांनी काल माजी राष्ट्रपती, माजी पंतप्रधान आणि विरोध पक्षाच्या नेत्यांशी फोनवरून चर्चा केली. त्या त्यांनी कोविड -१९ विषाणूमुळे उद्भवलेल्या परिस्थितीवर सूचना करण्याची विनंती केली.

coronavirus sonia gandhi write letter narendra modi
सोनिया गांधींनी पंतप्रधान मोदींना लिहिले पत्र, कोरोनाबाबत दिल्या ५ सूचना   |  फोटो सौजन्य: Times Now

थोडं पण कामाचं

  • काँग्रेस अध्यक्ष सोनिया गांधी यांनी आपल्या पक्षातर्फे पंतप्रधान नरेंद्र मोदी यांना काही सूचना केल्या आहेत.  
  • खासदारांच्या ३० टक्के वेतन कपातीच्या केंद्रीय मंत्रीमंडळाच्या निर्णयाला आमचा पाठिंबा असल्याचे सोनिया गांधी यांनी म्हटले आहे.  
  • सोनिया गांधी यांनी मोदींना केला पाच सूचना

नवी दिल्ली :  पंतप्रधान नरेंद्र मोदी यांनी काल माजी राष्ट्रपती, माजी पंतप्रधान आणि विरोध पक्षाच्या नेत्यांशी फोनवरून चर्चा केली. त्या त्यांनी कोविड -१९ विषाणूमुळे उद्भवलेल्या परिस्थितीवर सूचना करण्याची विनंती केली. त्यानुसार काँग्रेस अध्यक्ष सोनिया गांधी यांनी आपल्या पक्षातर्फे काही सूचना केल्या आहेत.  

खासदारांच्या ३० टक्के वेतन कपातीच्या केंद्रीय मंत्रीमंडळाच्या निर्णयाला आमचा पाठिंबा असल्याचे सोनिया गांधी यांनी म्हटले आहे.  सरकारी जाहिरातीवरील खर्च कमी करा, नवीन संसदेचा प्रकल्प रद्द करा, ३० टक्के पगार कपात करून असंघटीत कामगारांसाठी वापरा, परदेशी दौरे रद्द करा, पंतप्रधान केअर फंडातील निधी पंतप्रधान साहाय्यता निधीत वर्ग कराव्या अशा सूचना केल्या आहेत. 

नेमकं काय पत्र लिहिले आहे सोनिया गांधींनी...

काँग्रेस अध्यक्ष मा. सोनियाजी गांधी यांनी पंतप्रधान नरेंद्र मोदी यांना लिहिलेल्या पत्राचा मराठी अनुवाद.
 

मा. पंतप्रधान
कोवीड-१९ विषाणूच्या विरोधात लढण्यासंदर्भात आपल्याशी फोनवर चर्चा झाली. आपल्याशी झालेल्या चर्चेनुसार काँग्रेस पक्षातर्फे मी यासंदर्भात काही सुचना आपणास या पत्राद्वारे करत  आहे.

खासदारांच्या ३० टक्के वेतन कपातीच्या केंद्रीय मंत्रीमंडळाच्या निर्णयाला आमचा पाठिंबा आहे. कोवीड-१९ या महामारीच्या विरोधात लढण्यासाठी फार मोठा निधी उभा करणे ही काळाची गरज आहे.
यासंदर्भातच मी पाच प्रस्ताव देत आहे. मला विश्वास आहे की आपण ते अंमलात आणाल.

१)      सरकारी जाहिराती...टीव्ही, वर्तमानपत्र व विविध ऑनलाईन जाहिराती दोन वर्षे बंद करुन त्यातून वाचणारा पैसा हा कोरोनाविरुद्धच्या लढ्यासाठी उपयोगात आणावा. यातून कोरोनासंदर्भात जनजागृती करणाऱ्या जाहिराती मात्र वगळण्यात याव्यात. केंद्र सरकार सरकारी जाहिरातींवर दरवर्षी १२५० कोटी रुपये खर्च करते. याशिवाय सरकारी उपक्रम व सरकारी कंपन्यांच्या जाहिरातींवरही मोठा खर्च होत असतो. हा सर्व खर्च टाळला तर यातून मोठा निधी कोरोनाविरोधात लढण्यासाठी तसेच समाजाच्या मदतीसाठी उपयोगात येईल.
 
२)      ‘सेंट्रल विस्टा’ पुनर्विकास व सुशोभिकरणासाठी २० हजार कोटी रुपये खर्च केला जात आहे. सध्याची परिस्थीती पाहता एवढा मोठा खर्च करणे अयोग्य असून या कामाला स्थगिती देण्यात यावी. मला विश्वास आहे की सध्याच्या इमारतीतूनच संसद आपले संपूर्ण कामकाज करू शकते. आजच्या आपत्कालीन परिस्थितीत नवीन संसद व त्याची नवीन कार्यालये बांधण्याची गरज नाही. अशा संकटाच्या वेळी हा खर्च टाळता येऊ शकतो. या पैशांचा उपयोग नवीन रुग्णालये आणि वैद्यकीय संरक्षण उपकरणे ('पीपीई') देण्यासाठी तसेच आरोग्य कर्मचार्‍यांना अधिक चांगल्या सुविधांसाठी करणे आवश्यक आहे.
 
३)      भारत सरकारच्या खर्चाच्या अर्थसंकल्पात (पगार, निवृत्तीवेतन आणि मध्यवर्ती क्षेत्रातील योजना वगळता ) समान प्रमाणात 30 टक्के कपात केली जावी. ही 30 टक्के रक्कम (वर्षाकाठी सुमारे अडीच लाख कोटी रुपये) ही स्थलांतरित कामगार, कामगार, शेतकरी, हातावरचे पोट असलेले मजूर आणि असंघटित क्षेत्रातील कामगारांच्या मदतीसाठी वापरली जावी. 
 
४)      राष्ट्रपती, पंतप्रधान, केंद्रीय मंत्री, मुख्यमंत्री, राज्यातील मंत्री तसेच अधिकारी वर्गांचे परदेश दौरे स्थगित करण्यात यावेत. फक्त देशहिताच्या, आपत्कालीन व अत्यावश्यक असलेल्या परदेश दौऱ्यांनाच पंतप्रधानांनी परवानगी द्यावी. परदेश दौऱ्यांवर होणारा असा खर्च ( मागच्या पाच वर्षात पंतप्रधान तसेच केंद्रीय मंत्र्यांच्या परदेश दौऱ्यांवर ३९३ कोटी रुपयांचा खर्च झाला होता ) कोरोनाच्या लढाईसाठी उपयोगी आणला जाऊ शकतो.
 
५)      पंतप्रधान केअर फंडातील संपूर्ण निधी हा पंतप्रधान राष्ट्रीय सहाय्यता निधीमध्ये वर्ग करावा. यामुळे हा निधी ज्या पद्धतीने वाटप आणि खर्च केला त्यानुसार कार्यक्षमता, पारदर्शकता, जबाबदारी आणि लेखा परीक्षण सुनिश्चित करेल. सार्वजनिक सेवेसाठी अशा पद्धतीने दोन वेगवेगळे निधी तयार करणे हा वेळेचा व साधनसंपत्तीचा अपव्यय करण्यासारखे आहे. माझ्या माहितीप्रमाणे पंतप्रधान सहाय्यता निधीमध्ये ३८०० कोटी रुपयांचा निधी (आर्थिक वर्ष २०१९) पडून आहे. हा निधी तसेच पंतप्रधान केअर निधीत जमा झालेली रक्कम एकत्र करुन समाजातील गरजू व्यक्तींना अन्नधान्य व इतर मदतीसाठी वापरावी.
कोरोना विषाणूच्या या राष्ट्रीय आपत्तीवेळी देशाचा प्रत्येक नागरिक सहकार्य करत आहे. आपल्या कार्यालयाने घेतलेला प्रत्येक निर्णय व सूचनांचे पालन लोक करत आहेत. आता जनतेने आपल्यावर ठेवलेल्या  विश्वासाला सार्थ ठरवण्याची वेळ आपल्यावर आलेली आहे.
कोवीड-१९ च्या या संकटावेळी आम्ही सर्वजण आपल्यासोबत आहोत.
 
धन्यवाद..
 
श्रीमती सोनिया गांधी

ताज्या बातम्यांच्या अपडेटसाठी Times Now मराठीच्या फेसबुक पेजला लाइक करा.

पुढची बातमी