Agneepath Protest : नरेंद्र मोदी केवळ त्यांच्या ‘मित्रांचं’ ऐकतात, राहुल गांधींचा पंतप्रधान मोदींना टोला

ते फक्त ‘मित्रांचंच’ ऐकतात, राहुल गांधींचा मोदींना टोला  |  फोटो सौजन्य: Times of India

Agneepath Protest : पंतप्रधान नरेंद्र मोदी (PM Narendra Modi) यांना जनतेचा आवाज कधीही ऐकू येत नाही. त्यामुळे अग्निपथच्या (Agneepath) विषयावर सर्वसामान्य तरुण काय म्हणत आहेत, याकडे ते लक्ष देत नाहीत. त्यांना त्यांच्या मित्रांशिवाय कुणाचाच आवाज ऐकू येत नाही. म्हणून सर्वसामान्य जनतेनं अग्निपथ योजनेविरोधात कितीही आंदोलनं केली, तरी सरकारचं याकडं लक्षही जाणार नाही, अशी काँग्रेस नेते राहुल गांधी यांनी पंतप्रधान नरेंद्र मोदी यांच्यावर केली आहे. जीएसटी, नोटाबंदी, शेतकरी कायदे आणि आता अग्निपथ योजना. सातत्यानं जनतेच्या विरोधी असणाऱ्या योजना आणि धोरणं हे सरकार आणतं आणि जनतेकडून त्या नाकारल्या जातात, असं राहुल गांधी म्हणाले. 

मित्रांशिवाय मोदींना काहीच ऐकू येत नाही

आतापर्यंत ज्या ज्या योजना पंतप्रधान मोदी आणि त्यांच्या सरकारनं आणल्या आहेत, त्या समाजातील विविध घटकांकडून नाकारण्यात आल्याचं राहुल गांधी म्हणाले. सध्याच्या अग्निपथ योजनेला देशातील तरुणांनी नाकारलं, तीन कृषी कायद्यांना देशातील शेतकऱ्यांनी नाकारलं, नोटाबंदीच्या निर्णयाला देशातील अर्थतज्ज्ञांनी नाकारलं आणि जीएसटीला देशातील व्यापाऱ्यांनी नाकारलं, अशी टीका त्यांनी केली. सर्वसामान्य जनतेचा आवाज ऐकून या योजना आणल्या असत्या, तर अशी परिस्थिती उद्भवली नसती. मात्र मोदी हे फक्त त्यांच्या मित्रांचंच ऐकतात आणि त्यामुळे जनतेच्या विरोधातील योजना आणतात, अशी टीका त्यांनी केली. 

अधिक वाचा - President Elections 2022 : हा नेता राष्ट्रपती झाला, तर देशात दहशतवाद वाढेल ! भाजप नेत्याचा विरोधकांवर थेट आरोप

योजना रद्द करा - प्रियंका गांधी

केंद्र सरकारच्या अग्निपथ योजनेला देशभरातून विरोध होत आहे. त्यामुळे केंद्र सरकारने तातडीने ही योजना मागे घ्यावी, अशी मागणी काँग्रेसच्या महासचिव प्रियंका गांधी यांनी केली आहे. केंद्र सरकारनं पुढच्या 24 तासांत या योजनेत बदल करून नव्या नियमांसह ही योजना जनतेसमोर सादर करावी लागली, याचाच अर्थ पूर्ण विचार न करता ही योजना आणण्यात आली होती, अशी टीका त्यांनी केली आहे. 

ही योजना तातडीनं मागे घ्यावी आणि रद्द करावी, अशी मागणी प्रियंका गांधींनी केल आहे. एअर फोर्समध्ये अनेक जागांवर भरतीची प्रक्रिया शिल्लक आहे.  ही भरती लवकरात लवकर करावी अशी मागणी त्यांनी केली आहे. वयोमानाच्या अटीत सूट देऊन इतर सर्व योजना आधीप्रमाणेच लागू करावी, अशी मागणी प्रियंका गांधी यांनी केली आहे. 

अधिक वाचा - Confusion over Agneepath :अग्निपथ योजनेतील हे गैरसमज सरकारने केले दूर, विरोध करण्याअगोदर तरतूदी समजून घेण्याचा दावा

काँग्रेसकडून योजना रद्द करण्याची मागणी

सशस्त्र दलांमध्ये अल्पावधीसाठी तरुणांना दाखल करून घेण्याचा प्रकार चुकीचा असून सरकारनं हा प्रकार बंद करावा, अशी मागणी काँग्रेसनं केली आहे. या क्षेत्रातील तज्ज्ञांसोबत सरकारने चर्चा करावी आणि देशातील तरुणांची गरज आणि देशाच्या संरक्षणाची गरज यांचा नीट अभ्यास करून व्यवहारी योजना आखावी, असा सल्ला काँग्रेसनं सरकारला दिला आहे.