शेतकरी आंदोलन हिंसाचार : प्रियंका गांधींना उत्तर प्रदेश पोलिसांकडून अटक, अखिलेश यादव यांच्या घरासमोर पोलीस दल तैनात

हिंसाचाराच्या घटनेनंतर रात्री उशीरा या ठिकाणी पाहणीसाठी पोहचलेल्या काँग्रेसच्या महसचिव प्रियंका गांधी यांना मध्य रात्रीनंतर पोलिसांनी ताब्यात घेतल्याचा दावा काँग्रेस नेत्याने केला आहे.

priyanka gandhi vadra arrested from hargaon
प्रियंका गांधींना उत्तर प्रदेश पोलिसांकडून अटक  |  फोटो सौजन्य: Indiatimes
थोडं पण कामाचं
  • पाहणीसाठी पोहचलेल्या काँग्रेसच्या महसचिव प्रियंका गांधींना मध्य रात्रीनंतर पोलिसांनी ताब्यात घेतलं.
  • यूपीचे मुख्यमंत्री योगी आदित्यनाथ यांनी काल रात्री लखीमपूर खेरी प्रकरणाबाबत एक उच्चस्तरीय बैठक घेतली.
  • कृषी कायदेविरोधी शेतकरी आंदोलकांवर कथितरीत्या दोन कार घुसवल्यानंतर हिंसाचार घडला.

नवी दिल्ली : उत्तर प्रदेशच्या लखीमपूर खेरी येथे रविवारी शेतकरी आंदोलनादरम्यान हिंसाचार झाला. यात आठ जणांचा मृत्यू झाला आहे, यात चार शेतकरी तीन भाजप कार्यकर्ते आणि एक भाजप नेत्याचा वाहन चालकचा समावेश आहे. यादरम्यान उत्तर प्रदेशातील राजकारण तापले आहे आणि वेगवेगळ्या पक्षाचे नेते लखीमपूर खेरीमध्ये येण्याचा प्रयत्न करत आहेत. तर राज्य सरकारकडून त्यांना अडविण्यात येत आहे. हिंसाचाराच्या घटनेनंतर रात्री उशीरा या ठिकाणी पाहणीसाठी पोहचलेल्या काँग्रेसच्या महसचिव प्रियंका गांधी यांना मध्य रात्रीनंतर पोलिसांनी ताब्यात घेतल्याचा दावा काँग्रेस नेत्याने केला आहे. तर अखिलेश यादव यांच्या घरासमोर मोठं पोलीस दल तैनात करण्यात आली आहे. 

दरम्यान यूपीचे मुख्यमंत्री योगी आदित्यनाथ यांनी काल रात्री लखीमपूर खेरी प्रकरणाबाबत एक उच्चस्तरीय बैठक घेतली, ज्यात यूपीचे डीजीपी आणि अतिरिक्त मुख्य सचिव गृह अवनीश अवस्थी उपस्थित होते. सीएम योगी यांनी हिंसाचाराबद्दल दुःख व्यक्त करणारे निवेदन जारी केले आहे आणि म्हटले आहे की चौकशी होईल आणि दोषींना सोडले जाणार नाही. केंद्रीय गृहराज्यमंत्री अजय कुमार मिश्रा यांच्या बनवीरपूर गावात ही घटना घडली. उपमुख्यमंत्री केशव प्रसाद मौर्य हे एका कार्यक्रमासाठी गावात येणार होते. मौर्य यांच्या विरोधात निदर्शने करण्यासाठी जमलेल्या कृषी कायदेविरोधी शेतकरी आंदोलकांवर कथितरीत्या दोन कार घुसवल्यानंतर हिंसाचार घडला. आंदोलकांनी या दोन गाड्यांना आग लावल्याचाही आरोप करण्यात येत आहे. 

काँग्रेसच्या महसचिव प्रियंका गांधी यांना पोलिसांनी ताब्यात घेतल्याचा दावा काँग्रेस नेत्याने केला आहे. युवा काँग्रेसचे राष्ट्रीय अध्यक्ष श्रीनिवास बि. व्ही. यांनी, “प्रियंका गांधी वढेरा यांना हरगावमधून अटक करण्यात आलीय,” असा दावा आपल्या ट्विटमध्ये केला आहे.  “शेवटी तेच झालं ते भाजपाला अपेक्षित होतं. ‘महात्मा गांधीं’च्या लोकशाही देशामध्ये ‘गोडसे’ समर्थकांनी भर पावसामध्ये आणि पोलीस दलाच्या तुकड्यांना तोंड देत अन्नदाता शेतकऱ्याला भेटण्यासाठी पोहचलेल्या आमच्या नेत्या प्रियंका गांधी यांना हरगावमध्ये अटक केली. ही केवळ लढाईची सुरुवात आहे. शेतकरी एकजुटीचा विजय असो,” असे श्रीनिवास यांनी आपल्या ट्विटमध्ये म्हटले आहे.

रात्री अकराच्या सुमरास प्रियंका गांधी लखीमपूर खेरी येथील घटनास्थळी जाण्यासाठी रवाना झाल्या होत्या. “आजच्या घटनेवरुन दिसून येत आहेत की हे सरकार शेतकऱ्यांचा आवाज दाबण्यासाठी राजकारण करत आहे. हा शेतकऱ्यांचा देश आहे भाजपचा नाही. पिडितांच्या नातेवाईकांना भेटून मी काही गुन्हा करत नाही. ते आम्हाला का अडवत आहेत? त्यांच्याकडे अटक करण्यासाठी वॉरंट तरी हवं ना?,” असे प्रश्न प्रियंका यांनी उपस्थित केले आहेत. या घटनेचे राजकीय वर्तुळात तीव्र पडसाद उमटले आहेत. हा नरसंहार असून, शेतकऱ्यांचे बलिदान वाया जाऊ देणार नाही, अशी प्रतिक्रिया कॉंग्रेस नेते राहुल गांधी यांनी व्यक्त केली. समाजवादी पक्ष, राजदसह अन्य पक्षांनीही या घटनेवरून भाजप सरकारला लक्ष्य केले आहे. या घटनेनंतर शेतकरी नेते राकेश टिकैत रविवारी गाझिपूरहून लखीमपूर खेरीकडे गेले.

काय घडले?

केंद्रीय गृहराज्यमंत्री मिश्रा यांच्या बनवीरपूर या मूळ गावात काही विकासकामांचा शुभारंभ कार्यक्रम आयोजित करण्यात आला होता. या कार्यक्रमास प्रमुख पाहुणे म्हणून उपमुख्यमंत्री केशव प्रसाद मौर्य उपस्थित राहणार होते. ज्या हेलिपॅडवर त्यांचे हेलिकॉप्टर उतरणार होते, तेथेच सकाळपासून शेतकऱ्यांनी काळे झेंडे घेऊन धरणे धरले होते. समजूत काढूनही ते तेथून हलण्यास तयार नव्हते. तेथे शेतकऱ्यांच्या जमावात दोन मोटारी घुसल्याचे सांगण्यात येते. त्यानंतर हिंसाचार घडला. 

आज देशभर निदर्शने

लखीमपूर खेरी घटनेच्या निषेधार्थ आज, सोमवारी देशातील सर्व जिल्हाधिकारी कार्यालयांसमोर निदर्शने करण्यात येतील, अशी घोषणा संयुक्त किसान मोर्चाने केली. या घटनेची उत्तर प्रदेश प्रशासनाकडून नव्हे, तर सर्वोच्च न्यायालयाच्या विद्यमान न्यायाधीशांमार्फत चौकशी करावी, अशी मागणीही संयुक्त किसान मोर्चाने केली आहे. 


ताज्या बातम्यांच्या अपडेटसाठी Times Now मराठीच्या फेसबुक पेजला लाइक करा.

पुढची बातमी