Daily News Update : दिवसभरात अनेक घडामोडी घडतात अशावेळी जर आपल्याला महत्त्वाच्या घडामोडी जाणून घ्यायच्या असतील तर टाइम्स नाऊ मराठीच्या दिवसभरातील Daily News Update मधून नव्या घडामोडी जाणून घेऊ शकतात.
मुंबई उपनगर जिल्ह्यातील '166 अंधेरी पूर्व' विधानसभा मतदारसंघाच्या पोटनिवडणुकीसाठी 3 नोव्हेंबर 2022 रोजी सकाळी 7 वाजेपासून ते सायंकाळी 6 वाजेपर्यंत मतदान होणार आहे. त्यामुळे मंगळवार 1 नोव्हेंबर 2022 रोजी सायंकाळी 6 वाजेपासून जाहीर प्रचारावर निर्बंध लागू होण्यासह विविध निर्बंधदेखील लागू होत आहेत. या अनुषंगाने देण्यात येणाऱ्या सूचनांचे सर्व संबंधितांनी काटेकोरपणे पालन करण्याचे निर्देश अंधेरी पूर्व विधानसभा मतदारसंघाचे निवडणूक निर्णय अधिकारी प्रशांत पाटील यांनी दिले आहेत.
येत्या 3 नोव्हेंबर रोजी मुंबई उपनगर जिल्ह्यातील अंधेरी पूर्व विधानसभा मतदारसंघाच्या पोटनिवडणुकीसाठी मतदान होणार असून निवडणुकीसाठी 7 उमेदवार रिंगणात आहेत. या अनुषंगाने भारत निवडणूक आयोगाच्या मार्गदर्शक सूचनानुसार व आदर्श आचारसंहितेचा भाग म्हणून मतदान संपण्याच्या वेळेपूर्वी 48 तास आधीपासून जाहीर प्रचारावर निर्बंध लागू होण्यासह विविध निर्बंध लागू करण्यात येत आहेत.
भारत निवडणूक आयोगाच्या मार्गदर्शक सूचनांनुसार मतदान संपण्याच्या 48 तास अगोदर पासून प्रचार, प्रसार व जाहिरात याबाबत असणारे निर्बंध आणि घ्यावयाची दक्षता याबाबत सर्व उमेदवारांना आणि त्यांच्या प्रतिनिधींना प्रशिक्षणादरम्यान माहिती देण्यात आली आहे. त्यानुसार सर्व संबंधितांनी काटेकोरपणे काळजी घेणे नियमानुसार बंधनकारक आहे. तसेच या निर्बंधांचे उल्लंघन करणाऱ्या संबंधितांविरोधात संबंधित कायदा व नियमांन्वये कठोर कारवाई करण्यात येईल, असेही निवडणूक निर्णय अधिकारी पाटील यांनी कळविले आहे.
नवी मुंबईतील मुंबई कृषी उत्पन्न बाजार समितीत १०० जुड्यांप्रमाणे मेथी, पालक शेपूच्या दरात १८०० रुपयांची वाढ झाली आहे. कोथिंबीरच्या दरात ४००० ते ८५०० रुपयांची विक्रमी वाढ झाली आहे. कोथिंबीरचे भाव गगनाला भिडलेले आहेत. सद्यस्थितीत १०० जुड्यांप्रमाणे कोंथिबीर १२ हजार रुपये दराने विकली जात आहे. मिरचीच्या दरात ८०० ते ५०० रुपयांची वाढ झाली आहे. पावटा व वांग्याच्या दरात ५०० रुपयांची वाढ झाली आहे. कोबीच्या दरात ६०० रुपयांची वाढ झाली आहे. गवारच्या दरात पाचशे रुपयांची वाढ झाली आहे. फ्लॉवरच्या दरात ६०० रुपयांची वाढ झाली आहे. एकंदरीतच सर्वच भाज्यांच्या किंमती वाढलेल्या पाहायला मिळत आहेत. अवकाळी पावसाचा फटका विशेषतः पालेभाज्यांना बसल्याने भाज्यांच्या किंमती वाढल्या अशी माहिती व्यापारीवर्गाने दिली आहे.
बसखाली चिरडून एका वृद्ध महिलेचा मृत्यू झाला आहे. या प्रकरणी बसचालक महेश गाडीलकर यांना अटक करण्यात आली आहे. मालिनी सादये असे मृत महिलेचे नाव आहे.
मिळालेल्या माहितीनुसार मालिनी सादये दररोज सकाळी कुर्ला डेपोजवळ फिरायला जात. 27 ऑक्टोबर रोजी सकाळी 7.30 वाजता ती फिरायला निघाली आणि घरी परत आलीच नाही. म्हणून त्यांच्या मुलीने कुर्ला बेस्ट डेपोजवळ चौकशी केली असता तिला अपघात झाल्याचे समजले. जिथे तिची आई 310 क्रमांकाच्या डबल डेकर बसच्या मागच्या टायरखाली येऊन जखमी झाल्याचे समजले. व तिच्या आईला सायन रुग्णालयात हलवण्यात आल्याची माहिती मिळाली. कुर्ला डेपो परिसरातून बस सुटत असताना हा अपघात झाल्याचे पोलिसांनी सांगितले. मात्र, सीसीटीव्ही फुटेजमध्ये महिला टायरखाली झोपलेली दिसत आहे. महिला टायरखाली कशी आली याचा तपास पोलीस करत आहेत. बसमधील कंडक्टरने सर्व बाजू तपासल्या आणि बस पुढे नेण्यासाठी ग्रीन सिग्नल दिला. मात्र बस सुरू होताच महिलेचा मागच्या डाव्या टायरखाली चिरडला गेला. प्रवाशांनी आरडाओरड करून बस थांबवली आणि महिलेला सायन रुग्णालयात हलवले असता तिला मृत घोषित करण्यात आले. कुर्ला पोलिसांनी भारतीय दंड संहितेच्या कलम 304 अ आणि 279 नुसार गुन्हा दाखल केला आहे.
बसखाली चिरडून वृद्ध महिलेचा मृत्यू, बसचालकाला अटक
— Times Now Marathi (@timesnowmarathi) October 29, 2022
वाचा सविस्तर https://t.co/W38mKnC1NW pic.twitter.com/AiwaxIjGGW
ठाकरे गटाच्या नेत्या किशोरी पेडणेकर यांची चौकशी होणार आहे. भाजप नेते किरीट सोमय्या यांनी किशोरी पेडणेकर यांच्यावर आरोप केले आहेत. SRA मध्ये पेडणेकरांनी घोटाळा केल्याचा आरोप सोमय्या यांनी केला आहे. सोमय्या यांच्या आरोपानंतर दादर पोलिसांकडून किशोरी पेडणेकर यांची चौकशी होणार आहे.
महाविकास आघाडीच्या महत्वाच्या नेत्यांची सुरक्षा राज्यातील शिंदे-फडणवीस सरकारने काढली आहे. मिलिंद नार्वेकर यांची सुरक्षा मात्र वाढवण्यात आली आहे. तर जितेंद्र आव्हाड यांची सुरक्षाही जैसे थे ठेवण्यात आली आहे.
मुंबईच्या माजी महापौर किशोरी पेडणेकर अडचणीत सापडल्या आहेत. शुक्रवारी दादर पोलीस स्थानकात किशोरी पेडणेकर यांची 15 मिनिटं चौकशी झाली आहे. आज शनिवारी पुन्हा त्यांना चौकशीसाठी बोलवण्यात आलं आहे. एसआरएमध्ये फ्लॅट देण्याच्या नावाखाली झालेल्या फसवणुकीत जून महिन्यात दादर पोलीस स्टेशनमध्ये गुन्हा दाखल झाला होता. यामध्ये किशोरी पेडणेकर यांचे नाव नव्हते. मात्र, याप्रकरणी काही लोकांची चौकशी केली असता दोन किशोरी पेडणेकर यांचं नाव समोर आलं होतं. याचप्रकरणी शुक्रवारी त्यांना चौकशीसाठी बोलवण्यात आलं होतं.
अंधेरी विधानसभा पोटनिवडणुकीतील अपक्ष उमेदवार मिलिंद कांबळे यांनी केंद्रीय निवडणूक आयोगाकडे तक्रार दाखल केली आहे. गंभीर आरोप करत त्यांनी थेट निवडणुक रद्द करण्याची मागणी केली आहे.
मित्रांसोबत फिरायला गेलेल्या दोन तरुणांचा रिधोरा धरणात बुडून मृत्यू झाल्याची घटना वर्धा जिल्ह्याच्या सेलू तालुक्यात घडली. सौरभ बावरकर आणि विकास नवघरे अशी मयत तरुणांची नावे आहेत. चार मित्र शुक्रवारी रिधोरा धरण परिसरात फिरायला गेले होते. दरम्यान ते धरणामागील घोगरा परिसरात गेले. यावेळी त्यांचा एक मित्र धरणात पोहायला उतरला होता. तो पाण्यात बुडू लागला म्हणून दोन मित्र त्याला वाचवण्यासाठी पाण्यात उतरले. मात्र वाचवायला गेलेले दोघे मित्रही बुडू लागले. यावेळी आरडाओरडा केल्याने स्थानिक नागरिक मदतीसाठी धावून आले. नागरिकांनी एकाला सुखरुप वाचवले. तर वाचवायला गेलेले दोघे जण बुडाले.
दिल्लीवरुन बंगळुरुला जाणाऱ्या इंडिगो विमानाचं दिल्ली विमानतळावर इमर्जन्सी लँडिंग करण्यात आलं. बंगळुरुला जाणाऱ्या 6E-2131 या विमानाच्या इंजिनला आग लागल्याचं लक्षात येताच दिल्लीमध्ये लँडिंग करण्यात आलं.सविस्तर बातमी: IndiGo Flight: टेक-ऑफ करणाऱ्या विमानाच्या इंजिनला लागली आग
