Corona Vaccination: पंतप्रधान मोदींच्या हस्ते जगातील सर्वात मोठ्या लसीकरण कार्यक्रमाचा शुभारंभ

Covid-19 Vaccination: कोरोना लसीकरणाला देशभरात आजपासून सुरुवात झाली आहे. पंतप्रधान नरेंद्र मोदी हे व्हिडिओ कॉन्फरन्सिंगद्वारे देशभरात लसीकरण मोहिमेचा शुभारंभ केला.

Corona vaccination
प्रातिनिधीक फोटो (फोटो सौजन्य: iStockimages) 

थोडं पण कामाचं

  • देशभरात कोविड-१९ लसीकरण मोहिमेचा शुभारंभ 
  • पंतप्रधान नरेंद्र मोदी यांच्या हस्ते व्हिडिओ कॉन्फरन्सिंगद्वारे लसीकरणाचा शुभारंभ

नवी दिल्ली : कोविड-१९ लसीकरणाची (Covid-19 Vaccination) प्रतिक्षा आता संपली आहे. आजपासून देशभरात कोविड-१९ लसीकरण मोहिमेचा (Covid-19 vaccination drive) शुभारंभ करण्यात आला आहे. पंतप्रधान नरेंद्र मोदी (PM Narendra Modi) यांच्या हस्ते व्हिडिओ कॉन्फरन्सिंगद्वारे देशभरात लसीकरण मोहिमेचा शुभारंभ करण्यात आला. हा लसीकरण कार्यक्रम जगभरातील सर्वात मोठा कार्यक्रम असणार आहे. देशातील सर्व राज्य आणि केंद्रशासित प्रदेशांमधील एकूण ३६०० केंद्रांवर लसीकरणास सुरुवात करण्यात आली आहे.

या लसीकरणाच्या कार्यक्रमात केंद्रीय आरोग्य आणि कुटुंब कल्याण मंत्रालयाने विकसित केलेला को-विन (Co-WIN) हा डिजिटल प्लॅटफॉर्म वापरण्यात येणार आहे. या को-विन प्लॅटफॉर्मच्या माध्यमातून लसींचा एकूण साठा, पुरवठा, लस कोणाला दिली गेली, लसीचा दुसरा डोस पुन्हा कधी दिला जाणार यासारखी संपूर्ण माहिती उपलब्ध असणार आहे.

कोविड-१९ लसीकरणाचा शुभारंभ 

पंतप्रधान नरेंद्र मोदींच्या भाषणातील महत्वाचे मुद्दे

  1. लस संशोधनात सहभागी असलेले वैज्ञानिक आज विशेष कौतुकास पात्र ठरले आहेत. जे गेल्या कित्येक महिन्यांपासून कोरोनावर प्रभावी लस बनविण्यात सहभागी होते.
  2. खूप दिवसांपासून कोरोना लसीची प्रतिक्षा होती
  3. लस तयार करण्यासाठी सहसा बरीच वर्षे लागतात मात्र, अल्पावधीतच एक नाही तर दोन मेड इन इंडिया लस तयार झाल्या आहेत.
  4. आता लस उपलब्ध झाली असून, जगातील सर्वात मोठ्या लसीकरणाचा शुभारंभ होत आहे
  5. कोरोना लसीचे दोन डोस घेणे फार महत्वाचे आहे, पहिल्या आणि दुसऱ्या डोस दरम्यान सुमारे एक महिन्याचे अंतर देखील ठेवले जाईल
  6. दुसऱ्या डोसच्या केवळ २ आठव्यांनंतर आपल्या शरीरावर कोरोना विरुद्ध लढण्यासाठी आवश्यक सामर्थ्य विकसित होईल.
  7. इतिहासात अशा प्रकारे आणि इतक्या मोठ्या प्रमाणात लसीकरण मोहिम यापूर्वी चालवली गेली नव्हती. 
  8. जगात १०० हून जास्त देश असे आहेत ज्यांची लोकसंख्या ३ कोटींहून कमी आहे आणि भारत लसीकरण मोहिमेच्या पहिल्या टप्प्यात ३ कोटी नागरिकांना लस देत आहे.
  9. प्रथम कोरोना योद्धांना लस देण्यात येणार
  10. आरोग्य कर्मचाऱ्यांच्या लसीकरणाचा खर्च सरकार उचलणार
  11. दुसऱ्या टप्प्यात ३० कोटी जनतेला लस देण्यात येणार आहे. वयोवृद्ध आणि गंभीर आजाराने त्रस्त असलेल्या नागरिकांना या टप्प्यात लस दिली जाईल. 
  12. लस घेतल्यानंतर मास्क लावणे, हात धुणे गरजेचे 

प्रथम कोणाला लस देणार?

पहिल्या गटात शासकीय आणि खासगी दवाखान्यातील आरोग्यसेवक कर्मचारी, रोजंदारीवर काम करणारे कामगार आणि एकात्मिक बालविकास प्रकल्पातील कर्मचारी यांचा समावेश आहे.

दुसऱ्या गटात फ्रंटलाईन वर्करचा समावेश आहे ज्यात केंद्रीय पोलीस, सशस्त्र कृती दल, गृहरक्षक दल, नागरी सुरक्षा संस्थांमधील कर्मचारी, आपत्ती व्यवस्थापन स्वयंसेवक, महानगरपालिका कर्मचाऱ्यांचा यामध्ये समावेश आहे.

तिसऱ्या गटात ५० वर्षांवरील आणि ज्यांना अन्य व्याधी आहेत अशा ५० वर्षांखालील व्यक्तींचा समावेश आहे.

ताज्या बातम्यांच्या अपडेटसाठी Times Now मराठीच्या फेसबुक पेजला लाइक करा.

पुढची बातमी