कोल्हेंच्या भूमिकेमुळे NCP ची द्विधा मनस्थिती, नथुराम गोडसेच्या चित्रपटावरुन वाद
शरद पवार यांचा राष्ट्रवादी काँग्रेस पक्ष एका लाजिरवाण्या परिस्थितीत सापडला आहे... 'व्हाय आय किल्ड गांधी' हा चित्रपट ३० जानेवारीला प्रदर्शित होणार आहे. नथुराम गोडसेची भूमिका अमोल कोल्हे साकारत आहे. ते एक अभिनेता आहे. राष्ट्रवादीचे म्हणून खासदार निवडून आले आहे.
कोल्हेंच्या भूमिकेमुळे NCP ची द्विधा मनस्थिती, नथुराम गोडसेच्या चित्रपटावरुन वाद | फोटो सौजन्य: BCCL
थोडं पण कामाचं
- खासदार अमोल कोल्हे हे 'व्हाय आय किल्ड गांधी' या चित्रपटात नथुराम गोडसे ही भूमिका साकारत आहेत.
- चित्रपटाला विविध राजकीय पक्षांकडून विरोध
- सोशल मिडियावर अमोल कोल्हे यांनी त्यांची भूमिका मांडली आहे.
मुंबई : गांधी - नेहरुंची विचारधारा मानणाऱ्या शरद पवार (sharad pawar) यांच्या राष्ट्रवादी पक्षाचे खासदार अमोल कोल्हे (NCP MP Amol kolhe) यांचा येत्या ३० जानेवारी रोजी Why I Killed Gandhi हा चित्रपट प्रदर्शित होणार आहे. अमोल कोल्हे नथुराम गोडसेंच्या (Nathuram Godse) भूमिकेत दिसल्याने नव्या वादाला तोंड फुटले आहे. अनेक राजकीय पक्षाच्या नेत्यांनी यावर विरोध दर्शवला आहे. त्यात राष्ट्रवादीचे नेते जितेंद्र आव्हाड (jitendra awad) यांचाही समावेश असल्याने राष्ट्रवादीमध्ये द्विधा मनस्थिती आहे. दरम्यान, सोशल मिडियावर अमोल कोल्हे आणि राष्ट्रवादीला ट्रोल केले जात आहे. (NCP's dilemma due to Kolhe's role, controversy over Nathuram Godse's film)
छत्रपती शिवाजी महाराज आणि संभाजी महाराजांच्या भूमिकेत दिसणारे अभिनेते व राष्ट्रवादी काँग्रेसचे खासदार अमोल कोल्हे यांच्या व्हाय आय किल्ड गांधी या नथुराम गोडसेंच्या भूमिकेतील चित्रपटाचा प्रोमो नुकताच प्रदर्शित झाला आहे. ३० जानेवारीला हा चित्रपट OTT वर प्रदर्शित होणार आहे. मात्र प्रोमो प्रदर्शित होताच विविध स्तरातून विरोध होऊ लागला आहे. अनेक राजकीय पक्षांनीही विरोधाची भूमिका घेतल्याने नव्या वादाला तोंड फुटले आहे.
जितेंद्र आव्हाडांचा विरोध
कोल्हे यांच्या भूमिकेला त्यांच्याच पक्षाचे नेते जितेंद्र आव्हाड यांनी विरोध दर्शविला आहे. त्यात त्यांनी म्हटले आहे की, राज्यातील कुठल्याही कलाकाराने नथुराम गोडसेची भूमिका करावी, हे मला पटलेले नाही. अभिनय हा वरवर करता येत नाही. एक कलाकार या नात्याने अमोल कोल्हे यांनी ती भूमिका नाकारायला हवी होती. ज्या नराधमाने महात्मा गांधी यांना गोळ्या घातल्या, त्या माणसाचा अभिनय करणे मला मान्य नाही, अशा शब्दांत आव्हाड यांनीच विरोध दर्शविला आहे.
कोल्हेंचे स्पष्टीकरण
यावर खासदार कोल्हे यांनी सोशल मिडियावर आपली भूमिका स्पष्ट केली आहे. त्यामध्ये म्हटले आहे की, २०१७ साली केलेला “Why I killed Gandhi” हा सिनेमा Limelight या OTT प्लॅटफॉर्मवर प्रदर्शित होणार असं समजलं आणि अनेकांनी विचारलं डाॅक्टर तुम्ही नथुराम गोडसे या भूमिकेत? उत्तरादाखल मला कुठेतरी वाचलेलं वाक्य आठवलं- “हा महाराष्ट्र कीर्तनानं पूर्णपणे घडला नाही आणि तमाशानं पूर्णपणे बिघडला नाही!” या वाक्यातील नकारात्मक सूर बाजूला ठेवला तर मला या वाक्यात एक सकारात्मक गोष्ट जाणवते ती म्हणजे “Reel लाईफ” आणि “Real लाईफ” यातील फरक स्पष्ट करणारी सीमारेषा अधोरेखित करणं.”असेही अमोल कोल्हे यांनी म्हटले.
काय आहे प्रकरण
अभिनेते अमोल कोल्हे यांनी सन २०१७ मध्ये Why I Killed Gandhi हा चित्रपट स्वीकारला होता. यात कोल्हे यांनी नथुराम गोडसेची भूमिका साकारली आहे. त्यावेळी कोल्हे हे राष्ट्रवादी काॅंग्रेस पक्षात सक्रीय नव्हते. तसेच, कोणत्याही मतदारसंघाचे लोकप्रतिनिधी नव्हते. या चित्रपटाचे चित्रीकरण २०१७ मध्ये सुरू झाले होते. तो पूर्ण होऊन आता प्रदर्शनासाठी तयार झालेला आहे.
बातमीची भावकी
नथुराम गोडसे साकारणाऱ्या अमोल कोल्हेच्यामुळे राष्ट्रवादी काॅंग्रेसवर नेटकरी टिका करीत आहेत. त्यामुळे हे प्रकरण कोणते वळण घेते हे पाहणे औत्सुक्याचे ठरणार आहे,