Maharashtra MLC Election Result 2023 : भाजपचे ज्ञानेश्वर म्हात्रे विधानपरिषदेच्या कोकण शिक्षक मतदारसंघातून विजयी

औरंगाबाद शिक्षक मतदारसंघातील राष्ट्रवादीचे आमदार विक्रम काळे आणि नागपूर शिक्षक मतदारसंघात सुधाकर आडबाले (काँग्रेस) विजयाच्या वाटेवर. नागपूर शिक्षक मतदारसंघात भाजप पुरस्कृत नागो गाणार आणि औरंगाबाद शिक्षक भाजपचे किरण पाटील पिछाडीवर. 

नागपूर, अमरावती, औरंगाबादमध्ये मविआचे उमेदवार आघाडीवर; अमरावती पदवीधरमध्ये काँग्रेसचे धीरज लिंगाडे आघाडीवर, भाजपचे रणजित पाटील पिछाडीवर

औरंगाबादमध्ये मविआचे उमेदवार विक्रम काळे आघाडीवर, भाजपचे किरण पाटील सध्या पिछाडीवर

चिंचवडच्या पोटनिवडणुकीसाठी भाजपकडून अश्विनी जगताप भरणार उमेदवारी अर्ज

अमरावती पदवीधरमध्ये 28 हजार मतांची मोजणी पूर्ण, अद्याप लाखभर मतांची मोजणी बाकी, अमरावती पदवीधरमध्ये काँग्रेसचे धीरज लिंगाडे-भाजपचे रणजित पाटील यांच्यात चुरस

नागपूरच्या शिक्षक मतदारसंघात भाजप पुरस्कृत नागोराव गाणार आणि सुधाकर आडबाले यांच्यात जोरदार चुरस सुरू आहे. सध्या आडबाले 3 हजार मतांसह आघाडीवर आहेत.

औरंगाबाद शिक्षक मतदारसंघात चुरस, मविआचे विक्रम काळे यांना पहिल्या पसंतीची 6 हजार मते मिळाली. पण कोटा पूर्ण झाला नाही. यामुळे दुसऱ्या पसंतीच्या मतांची मोजणी सुरू झाली. दुसऱ्या पसंतीच्या मतांच्या मोजणीत विक्रम काळे पिछाडीवर. 

कोकणात महाविकास आघाडीला मोठा धक्का, भाजपचे ज्ञानेश्वर म्हात्रे विधानपरिषदेच्या कोकण शिक्षक मतदारसंघातून विजयी; भाजपच्या ज्ञानेश्वर म्हात्रेंना मिळाली 20 हजार 648 मते तर शेकापच्या बाळाराम पाटील यांना 9768 मते

नागपूर शिक्षक मतदारसंघात मतमोजणीची प्रक्रिया सुरू

नाशिक पदवीधर मतदारसंघात 1 लाख 29 हजार 456 जणांनी केले मतदान

औरंगाबाद शिक्षक मतदारसंघात मतमोजणी सुरू, आरंभीच्या मोजणीत विद्यमान आमदार विक्रम काळे (राष्ट्रवादी काँग्रेस) पिछाडीवर

1. आज शिक्षक आणि पदवीधर मतदारसंघांच्या 5 जागांसाठी मतमोजणी होणार आहे. या 5 जागांसाठी मतपत्रिका वापरून जुन्या पद्धतीने मतदान घेण्यात आले आहे. यामुळे मतपेटीतील सर्व मतपत्रिका एकत्र करून आधी त्यातून वैध मतपत्रिका आणि अवैध मतपत्रिका असे वर्गीकरण केल जाईल. यानंतर प्रत्येक मतदारसंघात त्या ठिकाणच्या वैध मतपत्रिकांच्या एकूण संख्येला दोनने भागून आलेले उत्तर अधिक एक अशी बेरीज करून अंतिम उत्तर काढले जाईल. हे उत्तर म्हणजे संबंधित मतदारसंघासाठी निश्चित केलेला मतांचा कोटा असेल. जो उमेदवार पहिल्या पसंतीच्या उमेदवारांचा मतांचा कोटा पूर्ण करेल तो विजयी होईल. 

2. कोटा पूर्णच झाला नसेल तर पहिल्या पसंतीची मते ज्याला सर्वांत कमी मिळाली त्या उमेदवाराला बाद ठरवून त्याच्या मतपत्रिकेत मतदाराने दुसरा पसंतीक्रम कुणाला दिला त्यानुसार मतमोजणी केली जाईल.

3. मतपत्रिकेत पसंतीक्रम शब्दांत नोंदविणे, एकाच उमेदवारांच्या समोर १, २, ३ असा क्रम लिहिणे असे आढळल्यास ही मते अवैध ठरविण्यात येईल.

4. मतदान केंद्रात असलेल्या जांभळ्या शाईच्या पेनाऐवजी इतर पेन वापरला तरीही मत अवैध ठरेल. याच कारणामुळे मतदानाच्या वेळी मतदान केंद्राबाहेरच मतदारांचे स्वत:चे पेन जमा करण्यात आले होते.

5. मतदारांना जांभळ्या रंगाचा विशिष्ट पेन निवडणूक आयोगाकडूनच देण्यात आला. 

6. नियमानुसार मतपत्रिकेत प्रथम पसंती दर्शविला नसल्यास मत अवैध ठरेल. कोणाची मते अवैध ठरली, हे मतमोजणीच्या वेळीच पुढे येईल.

महाराष्ट्रातल्या विधानपरिषदेच्या निवडणुकीच्या निकालाचे चित्र काही तासांत स्पष्ट होणार

महाराष्ट्रात विधानपरिषदेची निवडणूक लढवत असलेल्या सर्व उमेदवारांनी स्वतःच्या विजयाचा दावा केला आहे. मतदारांचा पाठिंबा मिळेल आणि हमखास निवडून येऊ असे या उमेदवारांचे म्हणणे आहे.

महाराष्ट्रात विधानपरिषदेच्या 5 जागांसाठी चुरस आहे. नाशिक पदवीधर मतदारसंघात सत्यजित तांबे आणि शुभांगी पाटील, अमरावती पदवीधरमध्ये काँग्रेसचे धीरज लिंगाडे-भाजपचे रणजित पाटील, औरंगाबादेत राष्ट्रवादीचे विक्रम काळे आणि भाजपचे किरण पाटील यांच्यात लढत आहे. नागपूर शिक्षक मतदारसंघात भाजप पुरस्कृत नागोराव गाणार व सुधाकर आडबाले, तर कोकण शिक्षकांमध्ये बाळाराम पाटील आणि भाजपचे ज्ञानेश्वर म्हात्रे यांच्यात चुरस आहे.

नाशिक पदवीधरचे काँग्रेसचे आमदार डॉ. सुधीर तांबे, अमरावती पदवीधरमध्ये भाजपचे आमदार डॉ. रणजित पाटील, औरंगाबाद शिक्षक मतदारसंघातील राष्ट्रवादीचे आमदार विक्रम काळे, नागपूर शिक्षकचे भाजपचे आमदार नागोराव गाणार, कोकण शिक्षकचे अपक्ष आमदार बाळाराम पाटील यांची मुदत ७ फेब्रुवारी 2023 रोजी संपेल.

महाराष्ट्रात नाशिक आणि अमरावती पदवीधर मतदारसंघ तसेच औरंगाबाद, नागपूर आणि कोकण शिक्षक मतदारसंघांच्या निवडणुकीचा निकाल आज जाहीर होणार आहे. विधानपरिषदेच्या या पाच जागांवर कोण निवडून येणार याकडे अनेकांचे लक्ष आहे. राज्यात विधानपरिषदेच्या नाशिक, अमरावती, औरंगाबाद, नागपूर आणि कोकण या पाच मतदारसंघांसाठी सोमवार 30 जानेवारी 2023 रोजी मतदान झाले. निवडणूक निकाल आज (गुरुवार 2 फेब्रुवारी 2023) जाहीर होणार आहे.