शिंदे आणि भाजपचं राज्यात मिशन २००; एकनाथ शिंदेंची नजर काँग्रेस-राष्ट्रवादीच्या आमदारांवर?

शिंदे आणि भाजपचं राज्यात मिशन २००; एकनाथ शिंदेंची नजर काँग्रेस-राष्ट्रवादीच्या आमदारांवर?  |  फोटो सौजन्य: Twitter

मुंबई : एकनाथ शिंदे यांनी बंड पुकारल्यामुळे राज्यातील मविआ सरकार कोसळलं. त्यानंतर एकनाथ शिंदे यांच्यासोबतच्या एकूण ५० आमदारांच्या पाठिंब्याच्या जोरावर भाजपने राज्यात सत्ता स्थापन केली. एकनाथ शिंदे (Eknath Shinde) हे राज्याच्या मुख्यमंत्रिपदावर तर उपमुख्यमंत्री देवेंद्र फडणवीस (Dycm Devendra Fadnavis) बनले. एकनाथ शिंदे यांच्या बंडामुळे राज्याच्या राजकारणात भूकंप झाला आणि शिवसेनेला एक मोठा धक्का बसला. या धक्क्यातून राजकीय नेते सावरत असतानाच आता आणखी एक मोठी बातमी समोर आली आहे. ती म्हणजे विरोधी बाकावरील १५ आमदार फुटणार असल्याची जोरदार चर्चा सुरू झाली आहे.

काँग्रेस-राष्ट्रवादीचे आमदार फुटणार? 

राष्ट्रपती पदाच्या निवडणुकीसाठी एनडीएकडून द्रौपदी मुर्मू हा उमेदवार आहेत. या निवडणुकीत राज्यातील २०० आमदार द्रौपदी मुर्मू यांना मतदान करतील असा दावा राज्याचे मुख्यमंत्री एकनाथ शिंदे यांनी केला आहे. सध्यस्थितीत भाजप आणि एकनाथ शिंदे यांच्या गटाच्या आमदारांची संख्या १७० इतकी आहे. तर शिवसेनेने या निवडणुकीत भाजपच्या द्रौपदी मुर्मू यांना पाठिंबा जाहीर केला आहे. त्यामुळे द्रौपदी मुर्मू यांना पाठिंबा देणाऱ्या राज्यातील एकूण आमदारांची संख्या ही १८५ वर पोहोचली आहे.

हे पण वाचा : बंदी असूनही भुशी डॅमवर पर्यटकांची गर्दी

मुख्यमंत्री एकनाथ शिंदे यांनी केलेल्या दाव्यानुसार, राज्यातील २०० आमदार हे द्रौपदी मुर्मू यांना मतदान करतील. त्यामुळे उर्वरित १५ आमदार हे कोण? तसेच हे आमदार काँग्रेस पक्षाचे की राष्ट्रवादी काँग्रेसचे फुटणार असा प्रश्न उपस्थित होत आहे. 

विधानपरिषद निवडणुकीत काँग्रेसची आठ ते दहा मतं फुटल्याचं समोर आलं होतं. काँग्रेसच्या अधिकृत उमेदवारांना आठ ते दहा मतं कमी मिळाली होती. त्यामुळे त्यापैकी आठ ते दहा मते ही राष्ट्रपती पदाच्या निवडणुकीत भाजपच्या पारड्यात पडतात का? हे पहावं लागेल. यासोबतच आणखी कुठले आमदार फुटतात हे पहावं लागेल.

बातमीची भावकी

Sharad Pawar: 'शिंदे-फडणवीसांची राज्य चालवण्याची कुवत काय आहे हे राऊतांना माहिती आहे', नागपुरातून पवारांचा खोचक पुणेरी टोला

NCP: 'फडणवीस सतत अपमान करतात, मुख्यमंत्र्यांच्या पाठीमागे भाजपचं षडयंत्र सुरु', सुप्रिया सुळेंचा आरोप

मनसेच्या एकमेव आमदाराला मंत्रिपद?, 'शिवतीर्था'वर गेलेल्या फडणवीसांची राज ठाकरेंसोबत तब्बल दीड तास चर्चा

एकनाथ शिंदे यांनी केलेल्या दाव्यानुसार, २०० आमदार द्रौपदी मुर्मू यांना मतदान करतील. त्यामुळे आता राज्यातील काँग्रेस आणि राष्ट्रवादीच्या आमदारांचा आधार घ्यावा लागणार आहे. राष्ट्रपतीपदाच्या निवडणुकीत तांत्रिकदृष्ट्या कुठलाही व्हिप लागू होत नाही. हे मतदान अतिशय गुप्त पद्धतीने होतं. त्यामुळे या मतदानाचा फायदा भाजप आणि एकनाथ शिंदे यांच्या गटाला होतो का हे पहावं लागेल. गुप्तमतदान असल्यामुळे काँग्रेस आणि राष्ट्रवादीची मते फुटण्याची दाट शक्यता वर्तवण्यात येत आहे.