'एसी लोकल'चा प्रवास होणार 'कूल', तिकिटांच्या दरात मोठी कपात

'एसी लोकल'चा प्रवास होणार 'कूल', तिकिटांच्या दरात मोठी कपात  |  फोटो सौजन्य: Representative Image

Mumbai AC local train fare to be reduced by 50 percent: MoS Danve : मुंबई : उन्हाळा वाढत असला तरी एसी लोकलमधील प्रवाशांच्या संख्येत अपेक्षित वाढ झालेली नाही. ही बाब लक्षात घेऊन रेल्वेने एसी लोकलच्या तिकिटांच्या दरात मोठी कपात जाहीर केली आहे. यामुळे अधिकाधिक प्रवाशांना एसी लोकलच्या 'कूल' प्रवासाचा अनुभव घेणे शक्य होणार आहे. रेल्वे राज्यमंत्री रावसाहेब दानवे यांनी एसी लोकलच्या तिकिटांच्या दरात मोठी कपात केल्याचे जाहीर केले.

एसी लोकलच्या तिकिटांच्या दरांमध्ये पन्नास टक्क्यांची कपात करण्यात आली आहे. यामुळे एसी लोकलमधील २५ किमी प्रवासाकरिता आधी १३५ रुपये मोजावे लागत होते आता ६५ रुपये मोजावे लागतील. तसेच एसी लोकलमधील ५० किमी प्रवासाकरिता आधी २०५ रुपये मोजावे लागत होते आता १०० रुपये मोजावे लागतील. 

तिकिटांच्या दरांमध्ये पन्नास टक्क्यांची कपात झाल्यामुळे एसी लोकलच्या प्रवासी संख्येत वाढ होईल, असा विश्वास रेल्वे प्रशासनाने व्यक्त केला. उन्हाळ्याच्या दिवसांत वाजवी दरात वेगाने प्रवास करण्यासाठी एसी लोकल हा एक सुरक्षित आणि सुखकर पर्याय आहे. यामुळे एसी लोकलला मिळणाऱ्या प्रतिसादात वाढ होईल, असे रेल्वे प्रशासनाचे म्हणणे आहे.

एक महत्त्वाचा प्रश्न अनुत्तरित

एसी लोकलच्या तिकिटांच्या दरातील कपात कोणत्या दिवसापासून लागू होणार याची माहिती अद्याप जाहीर झालेली नाही. ही घोषणा होईपर्यंत अस्तित्वात असलेल्या दरानेच एसी लोकलमधून प्रवास करता येणार आहे.

एसी लोकलच्या दरांमध्ये ५० टक्के कपात

1. ५ किमी - आधी ६५ रुपये - आता ३० रुपये
2. २५ किमी - आधी १३५ रुपये - आता ६० रुपये
3. ५० किमी - आधी २०५ रुपये - आता १०० रुपये
4. १०० किमी - आधी १९० रुपये - आता १४५ रुपये
5. १३० किमी - आधी ३७० रुपये - आता १८५ रुपये

बातमीची भावकी

कोरेगाव भीमा प्रकरणात शरद पवारांचा खोटेपणा उघड

Corona Cases in Maharashtra : महाराष्ट्रात ९६१ कोरोना Active, आज १६५ रुग्ण, २ मृत्यू

महिला गृहउद्योगाच्या नावाखाली महाघोटाळा