Mumbai Maharashtra Monsoon Weather update : मुंबई, रायगड, कोल्हापूरसह कोकणात पावसाने धुमाकूळ घातला आहे. पुढील पाच दिवस अतिवृष्टीचा इशारा देण्यात आला आहे. कोकण, मध्य महाराष्ट्र आणि मराठवाड्यातील काही जिल्ह्याला अलर्ट देण्यात आला आहे. तसेच मुंबई, ठाणे, रायगड, पालघर आणि दक्षिण कोकणातील सिंधुदुर्ग, रत्नागिरी पुढील पाच दिवस मुसळधार ते अतिमुसळधार पावसाचा अंदाज हवामान विभागाने वर्तवला आहे.
मुंबई : चुनाभट्टी येथील नागोबा चौक परिसरातील घरांवर दरड कोसळल्याने तीन जण जखमी झाले आहेत.शिवम प्रकाश सोनवणे(१७) प्रकाश जगन्नाथ सोनवणे(४२), सुरेखा वीरकर(२८) अशी जखमींची नावे आहेत. घटनेची माहिती मिळताच अग्निशमन दल, चुना भट्टी पोलीस आणि पालिका एल विभागाचे अधिकारी दाखल झाले आहेत.जखमींना सायन रुग्णालयात उपचारासाठी दाखल करण्यात आले असून त्यांची प्रकृती स्थिर आहे.
मुंबई परिसरात हवामान खात्याकडून रेड अलर्ट देण्यात आला आहे. या पार्श्वभूमीवर मध्य रेल्वे देखील सज्ज झाले असून मध्य रेल्वेने निवडलेल्या स्पॉटवर पाणी साचू नये याकरिता उपाययोजना देखील केले आहे मागील वर्षी प्रमाणे यावर्षी मोठ्या प्रमाणात उपायोजना करण्यात आला असून अनेक ठिकाणी रेल्वे रुळावरून पाणी काढण्याकरिता मोठे हेड पंप देखील लावण्यात आले आहे. मुंबईतील रेल्वे कडून कशाप्रकारे तयारी करण्यात आली आहे. या संदर्भातील माहिती मध्य रेल्वेचे मुख्य जनसंपर्क अधिकारी शिवाजी सुतार यांनी दिली आहे.
येत्या ४, ५ दिवस मान्सून राज्यात सर्वाधिक सक्रिय राहण्याची शक्यता.
या कालावधीत कोकण, मध्य महाराष्ट्रातील काही भागांत मुसळधार ते अति मुसळधार पाऊस पडण्याची शक्यता
विदर्भ, मराठवाड्यातही काही भागांत मुसळधार पावसाची शक्यता.
मुंबईत आज दिवसभर पाऊस सुरूच राहिल असा इशारा हवामान विभागानं दिला आहे. त्यामुळे समुद्रात मोठ्या लाटा उसळणार असल्याचा इशारा हवामान विभागानं दिला आहे. आज दुपारी 4 वाजून 49 मिनिटांनी 3.27 मीटर उंचीच्या लाटा समुद्रात उसळतील, असा इशारा हवामान विभागानं दिला आहे. नागरिकांनी समुद्रकिनारी जाऊ नये, असंही हवामान विभागानं सांगितले आहे.
यंदाही पावसाने जोरदार हजेरी लावल्याने कोल्हापूर जिल्ह्यात महापुराची नागरिकांनी धास्ती घेतली आहे. सलग दोन दिवस सुरू असलेल्या मुसळधार पावसाने पंचगंगेला मंगळवारी पूर आला. पंचगंगेचे पाणी रात्री 11 वाजण्याच्या सुमारास पात्राबाहेर पडले. पंचगंगेच्या पाणी पातळीत गेल्या 24 तासांत दहा फुटांनी वाढ झाली. सोमवारी सकाळी पंचगंगेची पातळी 15 फुटांवर होती. मंगळवारी सकाळी ती 24.5 फुटांपर्यंत गेली. दरम्यान आज (दि.06) नंतर सकाळी 9 पर्यंत 31 फुटांवर पोहोचली आहे. दर दोन तासाला सरासरी अर्धा फुटाने पाणी वाढत चालले आहे.
सातारा : सातारा जिल्ह्यात दोन दिवसांपासून पावसाने जोर धरला आहे. मंगळवारी दुपारी कराड शहरातील गुजर हाॅस्पिटलनजीक एक झाड रस्त्यावर कारवर कोसळले. यात कारचे आणि हाॅस्पिटलच्या सरंक्षक भिंतीचे मोठे नुकसान झाले. परंतू कारमधील चालक व सहप्रवाशांना कोणतिही इजा झाली.
महाराष्ट्रातील पूर परिस्थितीबाबत सीएमओची पूर्वतयारी
पूरस्थितीला प्रतिसाद म्हणून राष्ट्रीय आपत्ती व्यवस्थापन दल (NDRF) आणि राज्य आपत्ती व्यवस्थापन दल (SDRF) च्या 11 तुकड्या राज्यातील विविध जिल्ह्यांमध्ये तैनात करण्यात आल्या आहेत.
बेस स्टेशनवर 9 NDRF आणि 4 SDRF च्या एकूण 13 टीम तैनात करण्यात आल्या आहेत. राज्यात संपूर्ण कोकणासह अमरावती विभागातील काही जिल्ह्यांमध्ये मुसळधार पाऊस पडत आहे. त्यामुळे काही ठिकाणी पूरस्थिती निर्माण झाली आहे.
कोकण विभागातील पालघर जिल्ह्यात आज दुपारी 12 वाजेपर्यंत गेल्या 24 तासात सरासरी 100 मि.मी. पेक्षा जास्त पाऊस झाला आहे. जिल्ह्यात मुसळधार पावसाची शक्यता हवामान खात्याने वर्तवली आहे.
गेल्या 24 तासांत मुंबईत कुलाबा येथे 117 मिमी आणि सांताक्रूझ येथे 124 मिमी पाऊस झाला. रत्नागिरी जिल्ह्यात सध्या पूरस्थिती नसून जिल्ह्यातील दोन नद्या धोक्याच्या पातळीवरून वाहत असून जिल्हा प्रशासन सतर्क आहे.
