Shirdi Sai Baba: शिर्डी साईबाबा मंदिरात दर्शनासाठी नवी व्यवस्था, आता १२ हजार भाविकांना दर्शन घेता येणार

नाशिक
सुनिल देसले
Updated Dec 20, 2020 | 16:52 IST

Shirdi Saibaba darshan guidelines: सुट्ट्या आणि विकेंडमुळे वाढती गर्दी लक्षात घेत साई संस्थानने आता मंदिरात दर्शनासाठी नवी व्यवस्था केली आहे. यामुळे आता अधिक भाविकांना दर्शन घेता येणार आहे. 

Shirdi Sai Baba
शिर्डी साईबाबा (फोटो सौजन्य: sai.org.in) 

शिर्डी : कोविड-१९च्या (Covid-19) पार्श्वभूमीवर शासनाने दिलेल्या निर्देशांचे आणि नियमांचे पालन करुन १६ नोव्हेंबर २०२० पासून शिर्डी साईबाबा मंदिरात (Shirdi Sai Baba Temple) दर्शनाची सुविधा उपलब्ध करुन देण्यात आली आहे. त्यानुसार भाविक ऑनलाईन पास (Online pass for darshan) घेऊन दर्शन घेत आहेत. सुरुवातीच्या काळात दिवसभरात एकूण ६००० साईभक्तांना समाधी मंदिरात प्रवेश देण्यात येत होता. सद्यस्थितीत गुरुवार, शनिवार, रविवार, शासकीय सुट्ट्या आणि इतर महत्वाचे धार्मिक दिवस इत्यादी दिवशी शिर्डीत येणाऱ्या साई भक्तांच्या संख्येत वाढ होत आहे. साधारणपणे १५००० पेक्षाही अधिक साईभक्त दर्शनासाठी शिर्डीत येत आहेत.

१२००० भाविकांना दर्शनास प्रवेश 

सुट्ट्या आणि वीकेंड यामुळे वाढती गर्दी लक्षात घेत आता साई संस्थानने महत्वाचा निर्णय घेतला आहे. सर्व बाबींचा विचार करता शासनाचे कोविड-१९ संदर्भातील सर्व मार्गदर्शक सूचनांचे पालन करुन गर्दीच्या काळात जास्तीत जास्त १२,००० साई भक्तांना दर्शनासाठ प्रवेश देणे शक्य होणार आहे.

उपाययोजना करणे आवश्यक

साई भक्तांच्या गर्दीचा ओघ असाच कायम राहिल्यास सलग सुट्टीच्या काळात आलेल्या सर्व भाविकांना श्री साईबाबांचे दर्शन उपलब्ध करुन देणे शक्य होणार नाही. पर्यायाने कोणत्याही पूर्व नियोजनाशिवाय क्षमतेपेक्षा जास्त भक्तगण शिर्डीत आल्यावर मोफत दर्शनपास वितरण काऊंटर तसेच दर्शन रांगेत गर्दी वाढून अभुतपूर्व परिस्थिती उद्भवू शकते. साईभक्तांची संभाव्य गैरसोय टाळण्याच्या दृष्टीने सर्वांना सुलभ दर्शन व्हावे म्हणून खालील उपाययोजना करणे आवश्यक असल्याचं साई संस्थानने म्हटलं आहे.

  1. श्री साईबाबांच्या दर्शनासाठी शिर्डी येथे येणाऱ्या सर्व साईभक्तांनी संस्थानच्या online.sai.org.in या वेबसाईटद्वारे दर्शनपास आरक्षित करुन निर्धारित तारेखेला, वेळेतच दर्शनरांगेत प्रवेश करणे आवश्यक आहे.
  2. online.sai.org.in या वेबसाईटद्वारे सशुल्क दर्शनपास नियोजित दर्शन तारखेची आरक्षण सुविधा आरक्षण केल्याच्या तारखेपासून पुढील ५ दिवसांसाठी तसेच मोफत दर्शनपास नियोजित दर्शन तारखेची आरक्षण सुविधा आरक्षित केल्याच्या तारखेपासून पुढील २ दिवसांसाठी उपलब्ध असणार आहे.
  3. online.sai.org.in या वेबसाईटद्वारे दर्शनपास आरक्षण करताना साईभक्ताने स्वत:चा फोटो/ओळखपत्र संगणक (online) प्रणालीत अपलोड करणे बंधनकारक आहे. तसेच दर्शनासाठी येताना साईभक्तांना सोबत फोटो ओळखपत्र बाळगणे बंधनकारक राहील.
  4. दर्शनासाठी आलेल्या साईभक्तांना फोटो / ओळखपत्र पडताळणीअंती दर्शनपासवरील नमुद वेळेतच दर्शनासाठी प्रवेश देण्यात येणार आहे. 
  5. सलग सुट्टीच्या कालावधीत (उदा. गुरुवार, शनिवार, रविवार, शासकीय सुट्टी अथवा महत्वाचे धार्मिक दिवस इत्यादी) श्रीराम पार्किंग येथील मोफत दर्शनपास वितरण काऊंटरवर उपलब्ध असल्यास दुसऱ्या दिवसाचे मोफत दर्शनपास सकाळी १० ते सायंकाळी ५ वाजेपर्यंत वितरीत करण्यात येणार आहेत.
  6. तर, वरील सुट्ट्यांच्या दिवशी बुकिंग झालेले दर्शनपास याचा विचार करुन, दर्शनाचे मोफत दर्शनपास उपलब्ध असतील तरच संस्थानचे सर्व भक्तनिवासस्थान येथील मोफत दर्शनपास काऊंटरवर पहाटे ५ ते रात्री १० या वेळेतच वितरीत करण्यात येतील.

साई संस्थानच्या महत्वाच्या सूचना

  1. १० वर्षांच्या आतील मुले व ६५ वर्षांपेक्षा जास्त वयाच्या व्यक्तींनी कोविड-१९च्या पार्श्वभूमीवर दर्शनासाठी येण्याचे टाळावे. 
  2. कोविड-१९च्या पार्श्वभूमीवर निवासव्यवस्था मर्यादित असल्यामुळे संस्थानच्या निवासस्थानात रूम घेऊ इच्छिणाऱ्या भक्तांनी online.sai.org.in वेबसाईटद्वारे रूमचे आकाऊ बुकिंग करुनच निवासव्यवस्थेचा लाभ घ्यावा. 
  3. दर्शनासाठी आवश्यक दर्शनपास उपलब्ध नसतील तर मात्र, पास वितरण काऊंटर बंद करावे लागतील.
  4. दर्शनपासच्या उपलब्धतेबाबत प्रकटन दररोज तारीखनिहाय वेळोवेळी मंदिराच्या सर्व प्रवेशद्वारांवर, सर्व भक्तनिवास, वेबसाईट, वृत्तपत्रे व वृत्तवाहिन्यांवर प्रकाशित करण्यात येईल.

ताज्या बातम्यांच्या अपडेटसाठी Times Now मराठीच्या फेसबुक पेजला लाइक करा.

पुढची बातमी