Anganewadi Bharadi Devi Jatra 2022 : आंगणेवाडीच्या भराडी देवी जत्रेची ८ वैशिष्ट्ये

आंगणेवाडीच्या भराडी देवी जत्रेची ८ वैशिष्ट्ये 

8 Features of Anganwadi Bharadi Devi Jatra : आंगणेवाडी : महाराष्ट्रातील सिंधुदुर्ग जिल्ह्यातील मालवण तालुक्यात आंगणेवाडी हे गाव आहे. या गावात दरवर्षी भराडी नावाच्या देवीची जत्रा असते. यंदा ही जत्रा गुरुवार २४ फेब्रुवारी २०२२ रोजी आहे. आंगणेवाडीच्या जत्रेच्या निमित्ताने दोन दिवसांसाठी तळकोकणातील बहुसंख्य नागरिक गावी येतात. अनेक विवाहीत महिला देवीच्या दर्शनासाठी माहेरी येतात. 

दरवर्षी किमान सहा ते सात लाख भाविक आंगणेवाडीच्या जत्रेला हजेरी लावतात. यात मुंबई आणि ठाणे जिल्ह्यातून आंगणेवाडीला जाणाऱ्यांची संख्या मोठी आहे. मुंबईतील गिरगाव आणि गिरणगाव (लालबाग-परळ) येथून मोठ्या संख्येने नागरिक आंगणेवाडीच्या जत्रेला जातात. 

एस टी महामंडळाला आंगणेवाडीसाठी विशेष गाड्यांच्या व्यवस्थेमुळे किमान २०-३० लाखांचे उत्पन्न होते. अनेक खासगी टूर्स आणि ट्रॅव्हल्स कंपन्यांना पण आंगणेवाडीच्या जत्रेच्या निमित्ताने फायदा होतो. 

राजकारण आणि समाजकारण करणारे लोकप्रतिनिधी तसेच राजकीय पक्षांचे नेते, पदाधिकारी, कार्यकर्ते आंगणेवाडीच्या जत्रेला हमखास हजेरी लावतात. इतर नागरिकही येतात. यामुळे स्थानिकांना फुले, नारळ, प्रसाद, पूजेची थाळी, देवीचे फोटो अशा अनेक वस्तूंच्या विक्रीतून उत्तम उत्पन्न होते. यात्रेच्या काळात आंगणेवाडी आणि आसपासच्या गावांमध्ये दोन दिवस लोकांचा मोठा राबता असतो. आसपासची सर्व लहान-मोठी हॉटेल, लॉज भरलेले असतात. लाखो नागरिकांच्या खाण्यापिण्याच्या व्यवस्थेतून स्थानिकांना चांगले उत्पन्न मिळते.

बातमीची भावकी

Anganewadi Bharadi Devi Jatra 2022 Guidelines: आंगणेवाडी भराडी देवीच्या जत्रेत कोविड 19 चे पाळावे लागणार हे नियम, जत्रा २४ फेब्रुवारी रोजी 

Corona in Maharashtra : आज राज्यात आढळले कोरोनाचे एक हजार रुग्ण, २हजार ४८८ रुग्ण झाले बरे, ओमिक्रॉनचे आढळले शून्य रुग्ण

SSC Exam : दहावीच्या विद्यार्थ्यांसाठी महत्त्वाची बातमी, राज्य सरकारने जारी केली ही सवलत

जाणून घ्या आंगणेवाडीच्या जत्रेची ८ वैशिष्ट्ये

1. महाराष्ट्रातील सिंधुदुर्ग जिल्ह्यातील मालवण तालुक्यात आंगणेवाडी हे गाव आहे. या गावातल्या भराडावर म्हणजे माळरानावर प्रकलेली देवी म्हणून देवीला भराडी देवी असे नाव पडले. या देवीचा उत्सव हाच आंगणेवाडीच्या भराडीदेवीची यात्रा किंवा आंगणेवाडीच्या भराडीदेवीची जत्रा या नावाने ओळखला जातो. 
2. भराडी देवी ही आंगणेवाडी गावातील आंगणे कुटुंबाची देवी. पण नवसाला पावणारी अशी ख्याती पसरली आणि ग्रामस्थांसह सर्वांना देवीचे दर्शन खुले झाले.
3. आंगणेवाडी भराडीदेवीचे मंदिर हे खासगी आहे. पण भाविकांसाठी खुले आहे. या मंदिरात अनेक भाविक आपलं गाऱ्हाणं घालतात, नवस बोलतात. मनोभावे दर्शन घेणाऱ्यांच्या इच्छा पूर्ण होतात अशी भाविकांची श्रद्धा आहे.
4. जत्रेच्या निमित्ताने दरवर्षी लाखो भाविक आंगणेवाडीच्या भराडीदेवीचे दर्शन घेतात. मुख्य उत्सव दिड दिवसांचा असतो. असंख्य नागरिकांच्या उपस्थितीत पूजा होते.
5. आंगणेवाडीच्या जत्रेचा पहिला दिवस पाहुण्यांचा आणि उरलेला अर्धा दिवस ग्रामस्थांचा असतो. प्रामुख्याने माहेरवाशिणी एकत्र येऊन पूजा करतात, महाप्रसाद करतात. 
6. आंगणे कुटुंबियांच्या माहेरवाशिणी अबोल राहून महाप्रसाद तयार करतात. देवीचे दर्शन घेणाऱ्या प्रत्येक भाविकाला प्रसाद दिला जातो. 
7. आंगणेवाडीच्या भराडीदेवीच्या उत्सवाच्या निमित्ताने सांस्कृतिक कार्यक्रमांचे आयोजन होते. आंगणेवाडीचे ग्रामस्थ एक नाटक बसवतात. हे नाटक भाविकांसमोर सादर केले जाते. मिरजेहून आमंत्रित केलेले गोंधळी देवीसमोर गोंधळ मांडतात. दशावतार असतो.
8. तळकोकणात प्रभाव निर्माण करण्यासाठी अनेक राजकारणी आंगणेवाडीच्या जत्रेला हजेरी लावतात. शिवसेना पक्षप्रमुख उद्धव ठाकरे यांनी सेनेच्या १८ खासदारांसह २०१४ मध्ये देवीचे दर्शन घेतले होते. निवडणुका तोंडावर आल्या असतील तर जत्रेच्या निमित्ताने राजकारण्यांची मोठ्या संख्येने उपस्थित असते.