Holi : रंग खेळताना मोबाईल पाण्यात भिजला तर अशा प्रकारे सुरू करू शकाल

फोना-फोनी

रोहन जुवेकर

Updated Mar 07, 2023 | 08:43 IST

holi how to save your wet smartphone with these tips and tricks : रंग खेळताना मोबाईल पाण्यात भिजला तर घाबरू नका. काही उपायांच्या मदतीने भिजलेला मोबाईल सुकवून पुन्हा सुरळीत सुरू करणे शक्य आहे. जाणून घ्या मोबाईल पाण्यात भिजल्यास करायचे उपाय...

रंग खेळताना मोबाईल पाण्यात भिजला तर अशा प्रकारे सुरू करू शकाल | फोटो सौजन्य: Representative Image

थोडं पण कामाचं

रंग खेळताना मोबाईल पाण्यात भिजला तर अशा प्रकारे सुरू करू शकाल

मोबाईल पाण्यात भिजल्यास स्विच ऑफ (बंद) करा

पाण्यात भिजलेला मोबाईल जास्त हलवू नका, इतर भागांना पाणी लागून डिव्हाईस बिघडण्याची शक्यता वाढेल हे लक्षात ठेवा

holi how to save your wet smartphone with these tips and tricks : महाराष्ट्रात वापरल्या जाणाऱ्या पंचांगानुसार आज मंगळवार 7 मार्च 2023 रोजी धूलिवंदन आहे. मुंबईसह अनेक ठिकाणी आजच्या दिवशीच रंग खेळतात. रंगपंचमीच्या दिवसापर्यंत रंग खेळण्यासाठी थांबत नाहीत. यामुळे आज मुंबईसह देशाच्या अनेक भागांमध्ये रंग खेळून सण उत्साहात साजरा केला जाईल. रंग खेळताना त्वचेची, डोळ्यांची, नखांची, केसांची काळजी घेणे जेवढे महत्त्वाचे आहे तेवढेच आवश्यक आहे मोबाईल सांभाळणे. शक्यतो रंग खेळताना मोबाईल सोबत बाळगणे टाळावे. पण सवयीमुळे नकळत अथवा विशिष्ट कामामुळे रंग खेळताना मोबाईल सोबत बाळगावा लागला तर काळजी घ्या. कोणत्याही परिस्थितीत मोबाईलला रंग लागणार नाही तसेच मोबाईल पाण्यात भिजणार नाही याची खबरदारी घ्या. यासाठी मोबाईल प्लॅस्टिकच्या पिशवीत अथवा पाउचमध्ये व्यवस्थित ठेवा. रंग खेळताना मोबाईल पाण्यात भिजला तर घाबरू नका. काही उपायांच्या मदतीने भिजलेला मोबाईल सुकवून पुन्हा सुरळीत सुरू करणे शक्य आहे. जाणून घ्या मोबाईल पाण्यात भिजल्यास करायचे उपाय...

मोबाईल पाण्यात भिजला अथवा ओला रंग मोबाईलमध्ये गेल्याचे लक्षात आले तर ताबडतोब मोबाईल स्विच ऑफ (बंद) करा.
मोबाईल एखाद्या टेबलावर व्यवस्थित ठेवा. मोबाईल हलवून पाणी किंवा रंग काढण्याचा प्रयत्न करू नका.
मोबाईल कोरड्या कापडाने अथवा टॉवेलने अथवा टिश्यू पेपरने पुसून व्यवस्थित कोरडा करा. जर मोबाईल एखाद्या पिशवीत अथवा पाउचमध्ये असूनही भिजला असेल तर आधी पिशवी वा पाउचमधून बाहेर काढून कोरडा करा.
नंतर मोबाईल तांदुळासोबत एखाद्या कोरड्या डब्यात ठेवा. कच्चे तांदुळ मोबाईलमधील पाणी शोषून घेतील आणि मोबाईल कोरडा होईल.
मोबाईलच्या आतमध्ये पाणी गेले असेल तर मागच्या बाजूचे पॅनल उघडून मोबाईल तांदुळासोबत कोरड्या डब्यात ठेवा. पण मोबाईल झटकून पाणी काढणे अथवा हेअर ड्रायर वापरून मोबाईल सुकविणे टाळा. अलिकडच्या काळातील अनेक मोबाईलचे सेन्सर नाजूक असतात. ही बाब लक्षात ठेवून काळजी घ्या.
मोबाईल पूर्ण सुकला की चार्ज करा. तोपर्यंत चार्जिंग करणे टाळा. मोबाईलमध्ये पाण्याचा अंश शिल्लक असताना चार्जिंग केले तर त्यातून शॉर्ट सर्किट होण्याचा आणि नुकसान होण्याचा धोका आहे हे लक्षात ठेवा.
पाण्याने भिजलेला मोबाईल सिलिका जेलच्या पॅकेटमध्ये ठेवला तरी कोरडा होऊ शकतो. पण घरी सिलिका जेलचे पॅकेट नसल्यास तांदूळ हा उत्तम पर्याय आहे.
मोबाईल खूप जास्त ओला झाला असेल तर जवळच्या सर्व्हिस सेंटरमध्ये घेऊन जा. हे करताना मोबाईल एखाद्या कोरड्या कापडात अथवा कोरड्या टॉवेलमध्ये गुंडाळा. मोबाईल सर्व्हिस सेंटरमध्ये नेताना कमीत कमी हलेल याची काळजी घ्या. मोबाईल हलल्यास आतील पाणी वेगवेगळ्या भागांना लागून जास्त नुकसान होण्याचा धोका असतो हे लक्षात ठेवा.

Holi DP : व्हॉट्सअॅप, इन्स्टाग्रामसाठी होळी डीपी । अनोखी होळी : रंग खेळत नाहीत तर निखारे एकमेकांवर फेकतात