​MHADA Mumbai Lottery 2023: घरासाठी कसा अर्ज करणार?​

मुंबईत स्वतःच्या घराचे स्वप्न पाहणाऱ्या 4086 कुटुंबांचे स्वप्न लवकरच पूर्ण होणार आहे. सुमारे चार वर्षांच्या प्रतीक्षेनंतर सोमवारपासून मुंबईकरांना म्हाडाच्या घरासाठी अर्ज करता येणार आहेत.

mhada house (3)

18 जुलै रोजी म्हाडाच्या मुंबईत तयार झालेल्या 4086 घरांची लॉटरी निघणार आहे. म्हाडाच्या एका वरिष्ठ अधिकाऱ्याने दिलेल्या माहितीनुसार, लॉटरीत सहभागी होण्यासाठी अर्जदार ऑनलाईन किंवा म्हाडाने तयार केलेल्या अॅपद्वारे सोमवारी दुपारी 3 वाजल्यापासून म्हणजेच 22 मे पासून नोंदणी करू शकतात.

​नोंदणीची प्रक्रिया​

नोंदणीची प्रक्रिया 26 जून रोजी सायंकाळी 6 वाजेपर्यंत सुरू राहणार आहे. अर्जदार 26 जून रोजी रात्री 11.59 वाजेपर्यंत ऑनलाइन पद्धतीने रक्कम जमा करू शकतात. 2019 मध्ये म्हाडाने मुंबईतील घरांसाठी शेवटची लॉटरी काढली होती.

​गोरेगावात सर्वाधिक घरे​

लॉटरीत दादर, परळ, विक्रोळी, अंधेरी, जुहू, अँटॉप हिल आणि इतर कॅम्पसमधील घरांचा समावेश आहे. मात्र गोरेगावमध्ये बांधण्यात आलेल्या 1800 घरांपैकी बहुतांश घरांचा लॉटरीत समावेश करण्यात आला आहे. म्हाडाच्या इमारतींमध्ये प्रथमच जिम, स्विमिंग पूलसह इतर सुविधांची व्यवस्था करण्यात आली आहे.

​लॉटरी प्रक्रिया हायटेक होणार​

म्हाडाच्या घरांच्या संदर्भातील संपूर्ण प्रक्रिया ऑनलाइनच केली जाणार आहे. लॉटरी काढण्यापूर्वी अर्जदारांची कागदपत्रेही ऑनलाइन तपासली जातील, जेणेकरून लॉटरी निघाल्यानंतर काही दिवसांतच सर्व अनिवार्य प्रक्रिया पूर्ण करून विजेत्याच्या हाती चाव्या सुपूर्द करता येतील.

​कागदपत्रांची संख्या 7 ​

म्हाडाने अनिवार्य कागदपत्रांची संख्याही कमी केली आहे. लॉटरी सॉफ्टवेअर अपडेट करून म्हाडाने आवश्यक कागदपत्रांची संख्या 7 वर आणली आहे. यापूर्वी लॉटरीसाठी 21 कागदपत्रांची आवश्यकता होती.

​हे कागदपत्र तयार ठेवा​

आधार कार्ड, पॅन कार्ड, अधिवास प्रमाणपत्र, उत्पन्न प्रमाणपत्र, प्रतिज्ञापत्र, जातीचे प्रमाणपत्र याचबरोबर आरक्षणाचा लाभ घेत असलेल्या संबंधित कोट्याचे प्रमाणपत्र ठेवा.

​अधिकृत वेबसाइटला भेट द्या​

ज्यांना मुंबई म्हाडा लॉटरी 2023 साठी अर्ज करायचा आहे ते म्हाडाच्या लॉटरी.mhada.gov.in या अधिकृत वेबसाइटला भेट देऊ शकतात. तुम्ही यावर अर्ज करून स्वतःची नोंदणी करू शकता.

​अर्ज कसा करावा​

लॉगिन आयडी तयार करण्यासाठी मूलभूत माहिती भरावी लागेल.योजना निवडा आणि ठिकाणे शॉर्टलिस्ट करा.उत्पन्न गट, आरक्षण श्रेणी (SC/ST/ओपन) आणि विविध कोटा यासारखी माहिती भरा.तपशिलांची पुष्टी करा आणि डेबिट/क्रेडिट कार्ड, NEFT/RTGS नेट बँकिंग किंवा डिमांड ड्राफ्टद्वारे ऑनलाइन नोंदणी शुल्क भरा.

​मागासवर्गीयांना घरे​

म्हाडाच्या अधिसूचनेनुसार ही घरे पहाडी गोरेगाव, विक्रोळीतील कन्नमवार नगर, अँटॉप हिल, बोरिवली, मालाड आणि दादर येथे असतील. 4083 घरांपैकी 2788 घरे आर्थिकदृष्ट्या मागासवर्गीयांना, 1022 अल्प उत्पन्न गटाला, 132 मध्यम उत्पन्न गटाला आणि 39 उच्च उत्पन्न गटाला देण्यात आली आहेत.